A aldea do Couto en Ponteceso celebra desde este xoves a 40ª edición do seu Festiletras, cunha primeira xornada que se dedicou aos máis pequenos que gozaron do teatro, obradoiros, conto e a música de Paco Nogueiras.  A xornada deste venres terá moitas máis actividades para todos os públicos cun especial protagonismo da música que chegará a partir das 19 horas cos concertos de Lowcos, Zenzar, The Rapants e Deus Ke che Crew e amigos que actuarán nos diferentes escenarios (se a choiva permíteo). Antes diso, na mañá, haberá obradoiros, xogos de pistas e o espectáculo dos Quinquilláns “Por que é salgada a auga do mar?”.

O programa intensificarase de cara á fin de semana. Este sábado a Deputación terá un protagonismo especial coa celebración do Día da Provincia. Nesta ocasión, as áreas de Turismo e de Cultura suman apoios ao evento ao achegar dúas subvencións, de 16.000 e 23.000 euros, respectivamente. Con esa segunda axuda, a Deputación financiará o concerto de Baiuca, unha intervención de arte mural de Mutante Creativo e subidas en globo aerostático para todo o público.

“A Deputación”, salienta o vicepresidente e responsable de Turismo, Xosé Regueira, “desde sempre comprendeu a importancia da cita que acolle O Couto, tanto cando se programaba arredor do 17 de maio, como desde que se pasou a setembro”. “O Festiletras”, engadiu, “non é só unha das festas das letras senlleiras de Galiza e a que se leva celebrando de xeito ininterrompido desde hai máis tempo, corenta anos xa, senón que forma parte verdadeira do patrimonio inmaterial do territorio da Costa da Morte e mesmo de todo o país”. A Deputación levará tamén ao Couto unha caravana informativa “onde se vai a divulgar a importante labor de fomento que facemos tanto no ámbito cultural, como no dos premios literarios, artísticos e musicais que convoca a institución provincial cada ano, ou no dos festivais e outras actividades programadas a través da Rede Cultural” A Xunta tamén participa nesta edición do Festiletras coa Mostra de Artesanía. A través da Fundación Artesanía de Galicia promove o sábado e o domingo o obradoiro gratuíto aberto ao público familiar “Aprendendo a tecer”.